Ang Wikang Filipino ay hindi lamang basta-basta wikang ginagamit nating mga Pilipino dahil ito ay ating marka at palatandaan ng ating pagkatao. Batay sa mga datos na naiwan, mula sa pagiging simple ang wikang Filipino ay unti-unti at patuloy na umuunlad hanggang sa kasalukuyan. Ang wikang Filipino ang ating dala-dala kapag tayo ay nakikipagsapalaran sa ibang bansa. Ang wikang Filipino ay saksi ng bawat paghihirap, pagpupursigi at pagsisikap ng bawat pamilyang Pilipino upang makamit ang kaunlaran. Nararapat lamang nating kilalanin ang napakarami at napakalaking kontribusyon ng wikang Filipino sa kaunlarang tinatamasa ng bawat Pilipino sa ngayon.
